Vefdagbók Tryggva

Janúar var eiginlega farinn að verða bjánalega þungur svona í restina en í lok komu nauðsynlegar góðar fréttir til að rétta hann af. Það var venju samkvæmt mikið að gera í vinnunni hjá mér, kannski meira en venjulega en með góðri hjálp samstarfsmanna minna held ég að þetta hafi tekist svona nokkurn veginn. Það stendur þó ýmislegt út af borðinu mínu svona í lok mánaðarins en það tekst vonandi að berja það niður á næstu dögum.

Read the rest of this entry »

Árið 2009 byrjaði á nýjum stað en í lok ársins 2008 flutti ég norður. Janúar og febrúar gengu nokkuð tíðindalaust. Ég var í vikulegum ferðum suður vegna vinnu og stoppaði að jafnaði tvo daga sem jók ágætlega nýtinguna á gestaherberginu hjá mömmu. Við Valdís vorum dugleg að fara á tónleika, sáum Ljótu hálfvitana í janúar og 200.000 naglbíta. Mars einkenndist svo af undirbúningi fyrir áætlaða komu erfingjans (sem var 26. mars) en snáðinn litli (lét bíða eftir sér alveg til 7. apríl og kom þá í heiminn eftir keisaraskurð. Við eyddum fyrstu vikunni (þ.m.t. páskunum) á FSA vegna sýkingar og fékk hann sýklalyf í æð tvisvar á sólarhring á barnadeildinni. Þó það hafi auðvitað ekki verið draumastaðan er ekki hægt að segja annað en að starfsfólk FSA sé ekkert minna en frábært. Við byrjuðum svo maí á því að gefa drengnum nafnið Hartmann Völundur annars vegar í höfuðið á langafa sínum Hartmanni Eymundssyni og seinna nafnið kemur aðallega til vegna þess að hann var svo duglegur með hendurnar á sér strax frá fæðingu.

Read the rest of this entry »

Það er búið að ná að gera ýmislegt á síðasta mánuði. Mér tókst að fara í CISA prófið 12. des og var svona sæmilega undir það búinn. Niðurstaðan kemur svo eftir 8 vikur og vonandi var árangurinn nægjanlegur. Það er búið að klára ýmislegt en þó ekki allt á heimilinu fyrir Jólin. Allar jólagjafirnar eru þó frá nema gjöfin til Hartmanns frá foreldrunum, búið að setja öll jólakortin í póst og græja helstu hlutina fyrir jól. Það er ágætt að nota jólin sem afsökun til að koma hlutum í verk en jólin koma sama hvernig staðan á todo-listanum er. Mamma, Díana og Nonni koma til okkar um jólin, Díana og Nonni verða alveg fram á nýja árið en mamma skreppur aðeins að vinna milli hátíða en kemur svo aftur. Ég er búinn að vera að verja eina tösku með gjöfum fram og til baka í síðustu suðurferðum og vonandi verður síðasta ferð ársins á morgun og bara dagsferð. Tengdó og Ragna lentu svo í Köben í dag og verða þar fram á nýja árið.
Íbúðin niðri er svo tóm sem stendur og verður notuð undir gesti fram á nýja árið en þá tekur vonandi nýr leigjandi við. Það eru svo söluþreifingar í gangi í Tjarnarlundinum sem vonandi enda með sölu þegar veður leyfir. Þó verðið sé vitanlega ekki nógu hátt
Vinnan hefur gengið ágætlega, auðvitað ekki án erfiðleika en við því var s.s. að búast. Vertíðin er tæplega hálfnuð á þeim bæ og verður dálítið bratt núna í janúar og febrúar. Bæði eru stór og mörg verkefni í gangi og Valdís er að byrja að kenna aftur og það kallar auðvitað á aðlögun og breytingar.

Það er víst afmælið manns í dag, 32 ár að baki. Það er eiginlega hægt að segja að síðasta ár hafi verið dálítið viðburðaríkt og fátt í lífi manns sem er óbreytt. Hartmann fæddist, flutningar (norður) og flutningar (Ásvegur) aftur, talsverðar breytingar í vinnunni og jú eitthvað færri hár og grárri.

Ég var búinn að vera síðustu sex vinnudaga í Reykjavíkinni enda sjaldan flogið jafnmikið á milli eins og einmitt þetta árið. Það er alltaf voðalega ljúft að koma heim og Ásvegurinn verður einhvern veginn alltaf meira og meira heim. Svei mér þá ef þetta síðasta ár er bara ekki búið að vera betra en árið á undan, getting better all the time eins og Bítlarnir sögðu. Held það sé hverju orði sannara.

Þegar önnur verkefni (prófyfirferð o.fl. skemmtilegt) bíður er ýmislegt sem maður gerir annað. Eftir að okkur tókst að koma upp vinnuaðstöðu í gær fór maður auðvitað í ýmis verkefni sem hafa beðið eftir því að maður hefur borðpláss. Eitt af því var að uppfæra afritin inn á NAS-boxinu sem ég keypti í október í fyrra. Það voru líka nokkrir fídusar sem höfðu aldrei virkað, t.d. iTunes þjónustan og BT clientinn. Ég rak augun í að ég var að nota firmware 1.04 en 2.2B var nýjasta, sem er dálítið stökk. Ég tók auðvitað sénsinn (vitandi af afritum af flestu á öðrum stöðum) og uppfærði. iTunes datt í gang og m.v. aðstæður BT líka (tók smástund að fatta ákveðnar takmarkanir í nettengingum hjá mér…). 1Tb diskurinn í þessari græju er samt óðum að fyllast. Ein af skýringunum á því er væntanlega að myndasafn ársins er af einhverjum ástæðum mjög stórt. Mér finnst reyndar pínu galli að prentþjónninn í græjunni er ekki að tala við Bonjour (eins og t.d. iTunes-ið) en það virkar en það er betra fyrir okkur makkafólkið að tengja bara prentarann við borðvélina sem er hvort eð er oftast í gangi (eða mjög nálægt því að vera í gangi).
Jæja þetta var eitthvað sem átti að klárast fyrir um ári síðan Betra seint en aldrei.

Við höfum verið að skammta okkur verkefnin núna á helgarnar til að reyna að klára hluti fyrir Jól. Það gengur ágætlega og í dag náðist að klára vinnuherbergið. Við versluðum svefnsófa og fórum með gamla rúmið niður í kjallara og versluðum það sem flestir myndu kalla borðstofuborð en við höfum ákveðið að kalla vinnuborð. Þetta er 140×90cm borð (stækkanlegt en stækkun fylgir ekki) og með tölvuborði við hliðina þá er þetta alveg nothæf vinnuaðstaða fyrir tvo. Þar sem það er búið að bóka gistingu á öllum hæðum um Jólin var ágætt að fjárfesta líka í svefnsófa og koma gamla rúminu niður. Leigjandinn okkar þar sagði upp leigunni og verður íbúðin því tóm í desember en við ætlum að nýta okkur það til að hýsa ættingja um Jólin. Sjá svo til með að finna bara leigjanda til vorsins og hafa hana jafnvel tóma í sumar líka (með einhverjum lágmarkshúsgögnum) til að taka við gestum og gangandi sem verða á þvælingi. Gestagangurinn reyndar byrjar um næstu helgi en þá eru markmiðin s.s. ekki háleit en það á að ganga frá aðeins í herberginu hjá Hartmanni (málning og gólflistar). Það er svo alveg eftir að ganga frá ljósamálunum, ennþá dálítil austantjaldsstemming hjá okkur í þeirri deildinni.

Það kemur manni á óvart hvað tíminn flýgur áfram. Október er samt búinn að ganga ágætlega fyrir sig, mikið að gera bæði heima, í vinnunni og svo er auðvitað auka álag vegna kennslunar bæði í Reykjavík og á Akureyri (tvö kvöld í viku) en síðasti kennslutíminn er núna á eftir og þá er bara eftir að semja próf, leggja fyrir próf og fara yfir próf (jibbí!).
Það er óvenjumikið flakk á okkur þessa dagana. Ég fór suður á mánudag, til baka á þriðjudag og skrapp svo aftur í gær fram og til baka sama daginn og svo erum við að fara í fyrramálið (laugardagsmorgun) keyrandi suður og verðum í afmælinu hennar mömmu annað kvöld og sennilega kíkir maður aðeins við á árshátíð Deloitte. Við ætlum svo að stoppa í einhverja daga fyrir sunnan eftir helgina og fara bara aftur norður í rólegheitunum.

Helgin fór í algeran dugnað! Byrjaði eftir vinnu á föstudagskvöldið að ganga frá handföngum og læsingum á hurðirnar, laugardagurinn fór svo í að rusla til kössum, flokka, merkja og fara með drasl niður í kyndiklefa úr bílskúrnum og tókst mér að koma bílnum inn fyrir lok dags! Harla gott afrek það. Á sunnudaginn var svo ágætur dugnaður líka en í smærri og afmarkaðari hlutum. Afraksturinn er samt ágætur og eftir mikla vinnutörn var ágætt að komast í aðeins annan gír og skilja vinnuna alveg eftir, í vinnunni. Planið er svo að klára flísalögnina á baðinu (eftir framan á vatnskassann) á föstudaginn og jafnvel reyna að fara að láta sér detta í hug að finna spegil til að skella á vegginn og eitthvert sniðugt veggljós með.
Mánuðurinn er svo hægt og rólega að klárast og í október er stefnan tekin m.a. á 50. ára afmælisfagnað mömmu í Reykjavík. Það verður síðan nóg að gera bæði á vinnuvígstöðvunum og svo ver ég líka að kenna hluta af námi viðurkenndra bókara bæði í Reykjavík og á Akureyri þrjú mánudags- og föstudagskvöld í mánuðinum og þarf svo að halda próf fyrir allan hópinn um mánaðamótin. Þetta er þó sama og í fyrra þannig að þetta ætti að vera tiltölulega þægilegt.

Á síðasta mánuði er margt búið að gerast, Hartmann búinn að vaxta og dafna helling og orðinn duglegur að sýna sjálfstæði sitt. Vinnan er farin að aukast og nóg að gera á þeim vígstöðvum. Heima fyrir höfum við verið að láta hlutina gerast hægt og rólega, búið að setja innréttingu á baðið, fataskáp í herbergið, nýjar innihurðir (4stk), hengja upp gardínur og þetta er svona hægt og rólega að komast í horfið.
Það er allavega að verða nokkuð viðráðanlegur listi sem á eftir, ganga frá flísalögn í kringum klósett, græja ljós, panta spegil á baðið, taka til í bílskúrnum til að koma bílnum inn, skipta um rúðuna við útidyrahurðina og svo smotterí hér og þar. Þetta ætti allt að gerast klárast fyrir Jólin.

Hin alvara lífsins byrjaði núna á mánudaginn en þá snéri ég aftur til vinnu eftir tveggja mánaða sumarleyfi/fæðingarorlof. Ég byrjaði á tveimur dögum í Reykjavíkinni til að koma mér af stað en er nú aftur kominn heim og hjólin farin að snúast aðeins.
Framkvæmdirnar heima standa líka ágætlega, píparar létu sjá sig á mánudag og stendur því ekkert út af hjá þeim. Við ætlum að biðja Alfa um að smíða fyrir okkur innréttingu, skápa og hurðir og var mælt fyrir því á mánudaginn líka. Svo er bara að halda sig við efnið og verða ekki húsblindu að bráð!