Við kíktum við svo upp í Ráðleysu þar sem Steini og Bobba voru að skutla Eddu Rós og Hrafnkeli í flug og færðum okkur svo um set á fimmtudaginn yfir í Ráðleysu til að rýma til í Barmahlíðinni (og dreifa álaginu af Hartmanni á sanngjarnan hátt). Þar voru líka Öddi “frændi” og Gulla og buðu þau í magnaða veislu á fimmtudagskvöldið, humar og hrefnu og svo var setið fram eftir við kamínuna og eldurinn glæddur duglega. Í gær fórum við svo í eplatrjáaleiðangur í Hveragerði en fundum engin tré og vorum næstum því búin að villast í uppsveitum Mosfellsbæjar (þar eru jú engin hringtorg, hvernig á maður að vita að þetta er Mosfellsbær!). Um kvöldið voru svo grillaðar tvær litlar hásingar á grillinu sem Steini smíðaði úr færibandaskúffu úr fiskvinnslu. Við héldum svo norður á bóginn snemma í morgun (af stað kl 9:00!) og komum heim passlega til að Hartmann gæti tekið lúrinn sinn og safnað kröftum til að mæta í þriggja ára afmælið hennar Karenar Írani.

Ég tók fyrstu vinnudagana í síðustu viku sem “aðlögun” og svo byrjar alvara lífsins núna á mánudaginn með tveggja daga suðurferð. Það eru svo tvær vikur þangað til Hartmann byrjar í sinni aðlögun hjá nýju dagmömmunni og svo vika eða svo í viðbót þangað til vinnan fer af stað hjá Valdísi. Ég gekk svo frá samningi við Opna háskólann um kennslu hjá viðurkenndum bókurum núna í haust og verður bæði kennt á Akureyri og í Reykjavík eins og í fyrra svo október verður dálítið stífur en óneitanlega er haustið að koma.

Steini og Bobba voru hjá okkur og fyrri daginn fórum við í stuttan bíltúr upp Fljótshlíðina að skoða ummerki eldgossins en útsýni á jökul var ekki neitt. Hinn daginn tókum við svo magnaðan bíltúr upp í Dómadal, kíktum inn í Landmannahelli og svo stoppuðum við í Landmannalaugum og fengum okkur að borða. Það var svo valið að fara upp í Hrauneyjar og þaðan yfir til Laugavatns í heimsókn til Hreins frænda Valdísar og Guðrúnar. Var þetta langur og strangur túr en Hartmann stóð sig eins og hetja og lét það ekkert á sig fá að vera á níu tíma stanslausu flakki. Í gær tókum við svo mikla afslöppun og röltum bara um næsta nágrenni okkar þarna að Gaddstöðum en Steini og Bobba lögðu af stað heim á leið austur fyrir. Í dag tókum við okkar dót saman og lögðum af stað norður. Fyrsta stopp  var á Selfossi til að taka bensín (sem var vinsælt…) og kíktum svo í gott kaffi til Tryggva og Stínu í Grímsnesinu. Hartmann var smástund að átta sig á að það væri mjög gaman að þessu góða fólki en skemmti sér svo við mesta og tók duglega til matar síns. Við fórum svo til Þingvalla og svo norður Kaldadal og keyrðum Borgarfjörðinn í fallegu veðri niður að Baulu og tókum svo bara hefðbundnu leiðina heim.

Nú tekur við nokkurra daga afslöppun og hvíld heima og þó nokkrar umferðir af þvotti.

Ofan í þetta hefur svo Valdís verið að byrja að vinna aftur og Hartmann að byrja hjá dagmömmu. Síðasta vika var aðlögun hjá honum en við náðum bara að mæta tvo daga af þrem en það kemst vonandi í fastar skorður í næstu viku.

Bílhelvítið var líka með stæla í frostinu en vonandi er búið að koma í veg fyrir það með því að setja hann hreinlega í hleðslu eina og eina nótt (v12 tvinnbíll, geri aðrir betur!). Dugnaðurinn heima fyrir er búinn að vera í lágmarki og fátt komist í verk. Leigjandinn nýi í kjallaranum flutti inn í byrjun mánaðarins og við máluðum eitt herbergi þar niðri í tilefni af því. Leigjendurnir í Tjarnarlundinum létu svo vita af því að þau gætu farið út 6. feb sem eru miklar gleðifréttir og þá er hægt að ganga frá því máli og þá erum við bara með eina fasteign í “takinu”.

Suðurferðir voru nokkuð reglulegar að hefð en þó náðum við Óli Helgi að gera ágætis þorrabjórsúttekt. Óli Örn kíkti við á ferð sinni um landshlutann nýlega og Óli EL kíkti í belgískar vöfflur á nýársdag. Það er þó engin regla að gestir þurfi að heita Óli en það vissulega gerir bókanir auðveldari.  Í lok mánaðarins kom svo í ljós að ég hafði náð CISA prófinu sem ég tók 12. desember sem er ágætis léttir. Það er svo sem ekkert útlit fyrir að það verði minna að gera í febrúar en tíminn líður þó ágætlega hratt á meðan.

Ég tók ágætis slurk af fæðingarorlofi sem kom sér vel því að í lok maí seldist Öldugrandinn svo sem ekki á þann pening sem maður vildi fá fyrir hann en nóg til þess að við sett boltann í gang og buðum í Ásveg 20 í byrjun júní og fengum tilboð samþykkt að lokum. Afhending á því var svo 15. júlí og margt sem þurfti að gera og græja. Til lánsins tók ég mér sumarfrí/fæðingarorlof mestallan júní,júlí og fram í ágúst og var tíminn notaður að endurbæta nýja heimilið, stækka baðherbergi, rífa niður veggi, sameina fataskápa og mála heilan heilling. Þessar framkvæmdir kláruðust að mestu í byrjun ágúst en við fluttum inn 25. júlí og afhentum Tjarnarlundinn til leigjenda 1. ágúst og það tókst að afhenda Öldugrandann til kaupandans 21. júlí. Afsölin af þessum eignum voru svo 1. og 2. október og eftir talsvert þvarg tókst að ganga frá sölunni en kaupin gengu án allra vandræða.

Þegar fór að draga að hausti urðu talsverðar breytingar á vinnustaðnum mínum sem juku dálítið á Reykjavíkurdvölina hjá mér (oft 3 dagar í viku) en við gerðum líka ýmislegt annað eins og að fara í ungbarnasund með Hartmann sem var mjög skemmtilegt. Í október tók ég svo að mér eins og í fyrra kennslu í opna háskólanum hjá HR og í þetta skiptið tók ég þetta einn og í þokkabót var efnið kennt bæði í Reykjavík (mánudagskvöld) og á Akureyri (föstudagskvöld). Það var því ágætis sprettur og talsvert álag ofan á allt annað. Í desember þreytti ég CISA prófið og fæ vonandi niðurstöðuna öðru hvoru megin við mánaðamótin jan/feb 2010. Í desember náðist svo að selja Tjarnarlundinn sem eru miklar gleðifréttir á þessum síðustu og verstu tímum auðvitað. Eins og með Öldugrandann var verðið auðvitað of lágt en léttirinn mikill að vera laus við allan þennan fasteignarekstur. Það urðu svo leigjendaskipti í kjallaranum hjá okkur líka en íbúð stóð tóm í desember og kom hún sér ágætlega til að hýsa gesti.

Þetta var óneitanlega viðburgðaríkt ár með breytingum á flestum sviðum lífs míns en samt má segja að það hafi verið stærri viðburðir frekar en magnið. Við enduðum árið aldrei þessu vant á okkar eigin heimili og fengum til okkur Mömmu, Díönu systur og Nonna yfir hátíðirnar en tengdó fóru til Danmerkur með Rögnu og voru þar um hátíðirnar. Við tókum auðvitað gamlárskvöldið í Ásveginum þar sem er ágætis stemming. Landsbjörg var styrkt aðeins þetta árið, vonandi meira á næsta ári.

Það verður örugglega engin lognmolla á árinu 2010 frekar en fyrri daginn, fyrri hluti árs verður örugglega brattur á öllum sviðum og það er ekki hægt að segja annað en að það sé nóg að gera og því örugglega stutt þangað til maður sest niður á næsta nýársmorgni til að taka saman árið 2010. Gleðilegt nýtt ár.